恒隆地產（101）主席陳啟宗向來牙擦擦，做主持人啱晒佢。噚日佢有份主持亞洲金融論壇其中一場，𠱁到台下班掛住㩒電話的聽眾都笑到「卡卡聲」。原來佢攞工行（1398）董事長姜建清來開玩笑，問佢：「有人話A股長期被低估，好多內銀都有六、七厘息，派息好過唔少外國銀行，工行唔會執笠，咁買唔買得過呢？」
姜建清就好禮貌咁「交行貨」，「𠵱家PE、PB都非常低，國內商業銀行的盈利好……工行最近市值又重奪全球第一」，陳啟宗唔收貨，就話「工行A股今日跌停板喎！」引得台下一片笑聲。
不過姜建清都唔弱，馬上就話「早前漲停兩日，微調都好正常，資本市場都係唔評論」。陳啟宗就即刻笑住兜返：「我個人意見梗係買工行啦！」