有港大飯堂之稱嘅莎厘娜餐廳搬咗落西環高街半年，依然受一眾新舊港大生追捧。商務及經濟發展局前局長馬時亨（Fred）牽頭，噚晚帶埋一班港大老鬼喺飯堂擦餐勁兼敍舊，佢嘅老友葉澍堃、程翔等都有現身，仲請到港大前校長徐立之專程撐場，肥馬仲專登帶埋「電子大王」顧明均送嘅紅酒招呼大家
程翔當年食唔起
肥馬噚日飲多兩杯話當年，憶述讀大學時唔夠錢使，要走堂教書，一個月賺百幾蚊，出糧去莎厘娜食一餐五蚊已算食得豪，畢業後都好懷念呢度嘅羅宋湯，今次趁新年敍舊趁機回味吓。程翔一見老闆就呻，當年係窮學生一名，食一餐都係個幾銀錢，食唔起莎厘娜，只可以望門興嘆。
港大老鬼敍舊，又點可以唔講吓特首梁振英喺施政報告點名批評《學苑》？肥馬話香港有言論自由，特首同官員都可以作評論，不過「殺雞焉用牛刀」，使唔使寫落施政報告？但作為港大人應該開心，事關特首幫手宣傳，令《學苑》聲名大噪。程翔七十年代做過《學苑》副總編，話前任馮可強寫批評殖民地文章，時任港督戴麟趾以讀者身份回應，而唔係用港督身份批評學生，反觀今日特首做法真係無咩器量。