月初低調結婚嘅香港拳王曹星如（左），噚日首度見傳媒，佢喺DEF拳館對練時被打中要害，痛到跪地嘅佢（圖）話：「我已經個半月未試過呢種痛楚！」經理人劉志遠同記者講笑話：「你哋明白點解佢話唔生住啦？」
去年十一月喺澳門贏完職業生涯十五連勝後，加上搞婚事，唞咗個半月復操，噚日佢同菲籍嘅WBO亞洲洲際次輕量級冠軍Fred對練時，由於對手矮佢半個頭，所以唔小心打中「小星如」，星如話：「以前對練，一星期都有幾次俾矮過我嘅對手打中要害；今次因為冇練好耐，突然被偷襲真係幾痛。」
問星如幾時生小朋友，佢就話唔諗住：「婚後多咗責任，令我更有動力去為自己嘅拳擊事業努力。」星如連蜜月都要等今年七月挑戰完世界冠軍先再打算。為備戰三月爭取十六連勝，星如請咗菲籍新教練Jake Verano，準備幫佢喺威尼斯人出戰十回合嘅WBA國際超蠅量級冠軍腰帶，贏埋世界排名就會升上前五。打十回合就係想為七月迎戰日本拳手河里多公平爭WBA世界超蠅量級冠軍做好準備喎。
識睇，一定係睇足英台【英波Live】：
http://soccer.appledaily.com
http://bit.ly/engballlive