想當日蔡東豪，突然話恐懼兼誤判，忽然摺咗「主場新聞」上山修行。去到最近，突然出山再搞一檔「立場新聞」。唔搞由自可，一搞就惹來網民強烈反彈，一時間惡搞專頁海量般湧現！
論最精采，當然係報道陰間消息，借死人把口，抽盡生人水嘅「墳場新聞」可算係做得最出色。二零一五年一月十九日兩點五十五分，歷史性時刻來到了！因為「墳場新聞」facebook粉絲人數正式超過「立場新聞」嘅五萬零六百零七人！截至晚上十一時，「墳場」粉絲人數達五萬三千五百五十三，大幅拋離「立場」嘅五萬零九百一十九！
華華於是問負責「睇場」、被稱為「墳總」嘅青永屍係咪好開心，佢就話：「過五萬時特別喜悅。因為越來越多讀者同意『墳場』的看法。我覺得讀者和我都在『墳場』找到樂趣，這比單單看一篇長長而矯情的文章舒服。我看我的讀者都想香港好呀。他們都對香港的公平、作家的權利抱不平。這才是令我覺得最雀躍的東西。」留意返成個回應都冇提「立場」，但句句有骨，果然貫徹抽水作風。