東洋男星伊藤英明靠代表作《海猿》建立出正氣形象，不過當佢上年十月宣佈結婚冇耐，竟然爆出性醜聞，令本來深受OL歡迎嘅佢，隨即形象直插谷底。
伊藤俾人公開大概三年前嘅風流賬，當時佢喺夏威夷帶兩位女子上房玩3P，話明有圖有真相，當事人自然冇得抵賴。話晒海猿最拿手係潛水，當呢單新聞曝光後，伊藤當然係潛得快好世界。冇見一排，原來伊藤潛到出南太平洋，目的係為TBS電視台拍攝資訊性特輯，佢仲潛入大海近距離拍低座頭鯨嘅生產同埋成長過程，伊藤話呢次機會好寶貴，拍攝過程亦好感動，令佢開始有想做人老竇嘅衝動咁話！其實，冇露面幾個月嘅伊藤正積極洗底，可惜觀眾就算幾善忘都對佢嘅3P醜聞記憶猶新，似乎想翻身真係唔係易事。
撰文：李村姑