中證監暫停三間券商融資融券三個月，股市水喉突然被截，A股難免出現大屠殺，上海A股成交榜裡面股份全線跌停板。中央政策轉向，當然唔會由得股災出現。不過，政策轉向事出突然，對於A股短期衝擊，唔似一日跌完咁簡單。
要睇番經典嘅政策轉向例子，可以參考二零零九年八月，中央突然由放水轉收水一役，滬綜指由當年八月四日嘅高位3478，跌到去九月一日嘅低位2639，唔夠一個月跌幅達到24%。而睇埋當時滬綜指由金融海嘯後低位1668，升到3478，升幅108.5%。至於今轉，由舊年三月十二日嘅1974，升到去今年一月九日嘅3404，升幅72.4%，升浪遜於二零零九年。
升得冇咁多，自然未必跌咁多。滬綜指由一月九日高位到噚日收市已跌咗8.5%，如果未來一兩個月環球股市冇乜額外負面因素，預計A股額外跌多半成至一成就企得穩。調整時間長度方面，滬綜指日線圖9 RSI出現三頂背馳，按往績，指數至少唞番兩三個星期，先有可能見底。
撇除內地政策因素，A股係咪等兩三個星期雨過天晴就會回升，其實都要配合外圍因素。近幾個月，外滙、商品市場大幅波動，油價跌超過五成，部份貴金屬價格亦沉底，黃金價格就出現小陽春，瑞郎又突然宣佈升值，不明朗市況對於投資環境不利。相比二零零九年八月，環球市場開始擺脫金融海嘯陰霾，美國QE亦發揮作用，資產價格開始趨向穩定。論外圍狀況，而家遠比二零零九年八、九月不穩定。
A股ETF被追沽
A股開始調整，變相有多兩三個星期或以上時間去睇外圍市場變化，同時亦可細心研究吓有冇好股選擇，夾啱時機先入市。所以想加注或入市，唔爭在等多兩三個星期再行動，毋須心急，一月內咪嘥子彈，免得過都唔好login股票戶口買貨。
另外，噚日A股成交榜上面嘅熱門股份，幾乎隻隻跌停板，大戶沽到冇得沽，當然要搵香港上市嘅A股ETF追沽嚟保命，令安碩A50（2823）跌夠12%，多過A股跌停板嘅一成。呢個例子話畀大家聽，A股跌一成停板嘅制度，其實會加劇香港A股ETF嘅恐慌性拋售情況，所謂溢價、折讓，面對風頭火勢，自然形同虛設。
今年一月環球投資市場已經chok到爆，正如之前所講，今年一定比較舊年難玩，還好散戶嘅優勢係比大戶轉身快，眼前要做嘅係喺風浪之中趨吉避凶，喺跌浪冇被淹沒，賺錢機會就自然會行埋你身邊。
晉佳
http://www.facebook.com/pages/晉佳/719009541518415
本欄逢周二刊出