久違嘅大戰勝利，久違嘅揚威曼市，雲格（圖）喺危機中，再一次成功自我救贖。
自我救贖一，棄用「契仔」施捷斯尼。十六歲已踢阿仙奴，十九歲已有機會上一隊，呢位波蘭門將喺呢四季半，未證明到自己係世界級；上季尾終於迫到同胞法比安斯基離開，以為冇人可以再挑戰佢一哥位，點知去年尾快車作客修咸頓孭晒鑊，又輕出又甩手，賽後仲俾人揭發喺更衣室煲煙。契仔都冇情講，雲老咁鍾意護短，都要棄用；畀哥倫比亞嘅奧斯賓拿試吓打正選，點知頭髮攣攣，個樣幾搞笑，又唔夠高大嘅佢，又幾好腳頭，近三戰擔正零失球，抵現場擁躉咁撐，每次佢開龍門球時，都齊叫佢個名「奧……斯賓拿！」其實一點不笨。
自我救贖二，用年輕「雙連」。除咗買人孤寒，雲老俾球迷鬧得最多，係排陣保守，唔輪換，所以掛口邊嘅傷兵滿營都係自己攞嚟。孤寒好處，除咗替球會慳錢，年輕人上流機會大增。哥林張伯斯之前場場踢，散咗、跟住迪保治黑仔又入廠大修，焗用西班牙右閘小將比利連；跟住防中告急，又急召法國仔高基連返嚟，結果兩個都爭氣。周日晚除咗全場最佳嘅辛迪卡索拉，十八歲已經加盟、但大部分時間被流放嘅高基連繼續出色；全場攔截、爭頂頭槌及傳送成功率，分別達100%、88%及87%。隊長阿迪達，放心唞吧。
自我救贖三，辛迪卡索拉打中場中。如果阿迪達、韋舒亞、奧斯爾同藍斯仔，唔係輪流傷；季初被安排踢左中場嘅辛迪卡索拉，會唔會喺剛步過而立之年，先俾雲帥讚，呢位識左右開弓嘅小巨人，係時候做大佬踢中場中，叫班細嘅學好啲技術，先學人爭位？今場賽前，傳媒焦點集中晒「山神」山齊士，結果呢位智利人，同同胞曼城領隊比歷連尼嘅排陣一樣，冇乜料到；反而卡索拉大玩魔術腳，全場一百○一次觸球，一入球一助攻，開心到助基奧特入波後，場上跳舞。奧斯爾繼續喺後備席食西北風，傷後嘅佢好似大隻咗一個碼，不過唔知幾時有同來自西甲嘅卡索拉咁嘅火喉。
曼城近十年用咗淨七億鎊擴軍，係阿仙奴嘅六倍，年年爭冠軍係必然期望。阿仙奴，𠵱家嘅傷兵問題，好過上半季好多，可惜淨番十六場波，要爭霸，太遲發力咯；但肯腳踏實地，照樣鬥強隊先求穩守博突擊，繼續攞第四應該冇問題，能唔能夠去番三季前嘅第三，甚至更高排名，呢隊波，一向都係睇雲格造化，踢得好，根本唔使要望曼市雙雄同利記失分。
有時，打聯賽，同長跑一樣咁艱辛，唔怕其他人呢一刻走得比你快或者過你頭，過程享唔享受都係自己，冠軍，得一個，邊有咁易啊。
雲格喺英超能生存近廿載，我想，佢大部份時間係咁諗！
文：波神