有時八方都覺得啲職業婦女好犀利，又要返工又要湊BB，少啲精力都唔得。立法會議員嘅李慧琼，最近就賣大包分享做職業婦女嘅心得。民建聯家庭事務委員會近日推出親子雜誌《家+We are Family》，打算每季推一期，印六千本派街坊，創刊號搵嚟唔同人士講吓夫妻之道，由李慧琼打頭陣講吓，點樣一人分演議員、老婆同媽媽嘅角色。李慧琼笑言：「一般女性議員入到議會，性格就有轉變。」事關對住官員發言，講講吓就習慣大聲，如果返到屋企用咁嘅口脗同老公講嘢，就唔多好啦，久而久之磨擦一定多，所以畀貼士從政女士，最緊要識角色分裂，意識到唔同身份有唔同定位。雖然平時佢唔多時間陪囡囡，但每晚都會買消夜畀阿囡𠱁佢歡喜。