佔中金融組喺佔中秘書處解散之後改名，變身「2047香港金融監察」，最近趁亞洲金融論壇舉行有新搞作，召集人錢志健噚日宣佈喺海外報章登廣告，向國家主席習近平提出十個訴求，仲邀請林鄭出席分享會聽吓金融人心聲。但登報有阻滯之餘，錢志健話林鄭透過發言人喺分享會開始前幾個鐘話唔得閒到。
錢志健同一班金融人舊年四月喺英國《金融時報》登過呢十個訴求，包括建立有國際標準嘅普選制度、捍衞新聞自由等等。佢見雨傘運動過咗，呢啲訴求似乎更加渺茫，惟有再登，仲cc埋畀人大委員長張德江、中聯辦主任張曉明同林鄭，梁振英繼續冇份。錢志健原本預廣告噚日或今日登，但佢話份報紙「需要時間睇一睇」，可能要拖到周四或五，佢希望只係因為美國正值假期而延遲而唔係題材敏感。