駐港解放軍、中聯辦同特首梁振英合力炮製嘅「青少年軍總會」，似足喺香港搞解放軍「少年版」，百家爭鳴，社運界嘅「紅人」熱血公民都唔執輸，熱血精神領袖黃洋達噚日話要成立「熱血少年軍」，「以較溫和的方式參與社會」，同梁太唐青儀任總司令嘅青少年軍抗衡。有網民好關注，呢隊少年軍制服係咪熱狗咁款？
會落區探訪長者
根據熱血時報嘅facebook，黃洋達構思中嘅「熱血少年軍」係要嚟抗衡梁太嘅少年軍，仲話目的係要「培訓18歲以下的青少年以較溫和的方式參與社會，如社區服務、長者探訪等」。嘩，乜咁河蟹㗎？唔似熱血喎。萬一熱血少年將來去到老人院做義工時，同啲公公婆婆喺政治問題上開拖，熱血少年軍可唔可以駁嘴先？萬一有爭執，佢哋會唔會攞記者證出嚟即場採訪？
而由梁唐青儀粉墨登場做總司令嘅青少年軍，一身解放軍嘅綠色制服，真係唔睇得都嚇得吓人，所以唔少網民都想知道，呢隊黃洋達領導嘅熱血少年軍，係咪一樣喺制服上別出心裁？好多人都建議佢哋以一身熱狗look迎戰。
講咁多嘢，幾時成事？黃洋達喺佢個facebook話好快：「識我咁耐，你地（哋）應該知，我通常講左（咗）就做，而且通常好快就會做。」八方覺得大家唔使擔心，熱血同提出城邦論嘅陳雲咁老友，陳雲又冊封咗N咁多個蝦兵蟹將、公主王子，熱血少年軍，豈會潰不成軍？
李八方
mailto:[email protected]