「口裏說不，身體卻很誠實」，呢番說話除咗可以寸一邊驚幅射，又一邊去日本旅行嘅香港人外，仲可以寸吓阿仙奴名宿亨利；呢位「高貝利之王」周日就首次做講波佬，幫英國《天空體育》評述英超，電視台就特登揀咗場佢母會阿仙奴作客曼城嘅比賽佢講，亨利賽前就咁狂踩兵工廠唔掂，不過阿仙奴2:0擊敗曼城後，佢就大讚槍手，到底佢係發功定變臉？
話球隊冇好防中
三十七歲嘅亨利上年喺美職聯紐約紅牛掛靴後轉戰講波界，周日就處子登場。要亨利講阿仙奴就真係易如反掌，開波前佢就分析阿仙奴防中唔掂，以兵工廠嘅陣容，應該可以爭標，𠵱家目標先係前四，真係不似預期；阿仙奴嘅拼圖就係欠缺好防中去保護防線，以往佢踢阿仙奴嗰陣，就有韋拉拍基拔圖施華，𠵱家最好搵番桑治，唔使中堅梅迪薩卡咁狼狽。
俾師兄咁樣踩法，槍手周日就真係夠晒爭氣，上半場廿四分鐘，左閘蒙利爾博到十二碼，辛迪卡索拉射入先開紀錄，下半場曼城就算換入祖維迪同迪斯高，同阿古路打三箭頭都冇用；阿仙奴頂得住之餘，再靠辛迪卡索拉助攻基奧特頭槌建功，以2:0勝出，拎到近五場聯賽嘅第四勝，二○一○年後再次作客擊敗曼城㖭。
卡索拉爭氣2:0破「城」
辛迪卡索拉交出一個入球一個助攻，固然威威，二十三歲嘅法國防中高基連，亦都威俾師兄睇，全場助攻助守，唔輸蝕得過曼城「雙費」防中㗎。阿仙奴領隊雲格終於喺前列大戰贏波，佢就好開心咁講：「呢場波就好似轉捩點，增強球員嘅信念同信心，今場勝利對未來走勢好重要。」咁講真，阿仙奴贏波，都仲落後榜首車路士十三分，剩番十六輪，爭標都幾難，不過距離第四嘅曼聯只差一分，都叫仲有得追吓（見附表）。曼城輸波後，又俾車仔拉番開五分距離，下場聯賽作客車仔，輸埋就差唔多宣佈衞冕無望。
亨利跌晒眼鏡，賽後就梗係想補鑊啦，佢就喺twitter話，好享受自己嘅講波佬地標戰，呢場對阿仙奴係一個偉大勝利，辛迪卡索拉仲光芒四射㖭。亨利仲預告自己下場評述嘅比賽，會係廿七號車路士對利物浦嘅英聯盃四強次回合，唔知佢又會唔會講番紅軍隊長謝拉特，派膠式回傳俾佢嘅往事呢？
識睇，一定係睇足英台【英波Live】：
http://soccer.appledaily.com
http://bit.ly/engballlive