券商股呢鋪大鑊了！阿爺上周五使出兩招打孖展，叫信証、海通、國泰君安三間證券行暫停孖展開戶，以及將孖展戶最低要求提升至五十萬元（人民幣．下同），表明睇輕描淡寫，但其實打蛇打七寸，一下打中券商股死穴。單單睇信証條孖展數，就知情況有幾恐怖，恐怕股價仲有排冧。
舊年十二月以來，信証日日都係A股成交之冠，一般都超過三百億元，但噚日成交大幅萎縮至不足十五億元。點解？因為全世界沽唔到貨，一直到收市，跌停板位置仲有超過七百三十萬手賣單排緊隊。
信証股價舊年下半年至今急升1.5倍，全靠孖展買盤頂住。上周末，買信証股票嘅孖展餘額亦係A股之冠，達三百三十億元。中證監話，要整改違規孖展，噚日信証宣佈，會將借出去嘅違規孖展強制平倉，相信其他券商亦會照做。呢三百三十億元孖展盤中，肯定有部份需要強行斬倉，而家連沽貨都冇機會，股價恐怕要冧一段時間，先可以消化到。
內地二零一零年先有孖展，在跌停板機制下，如果做唔到斬倉，到底會發生乜事，全世界冇人知，因為歷史上從未發生過。唔怪得中信集團寧願被人話內幕交易，都要在上禮拜偷步減持市值逾一百億元中信証券股份。
李可強