禮拜三谷草賽事用C跑道,睇番最近11月26日同一移欄賽事,四場1200米或以下短途賽事中,分別有「勝利寶石」及「控制者」一放到底,另外「精算率然」守包廂位建功,內叠前置優勢甚大。反而四場中距離賽事都由居中後上馬勝出,其中「風采」更加單憑一條直路由包尾反先對手,所以大家揀馬要有兩手準備。今戰列陣馬中,第六場「牛精好友」三次角逐谷C欄獲兩冠一亞,抽四檔形勢好跑,有力打開今季勝門。另外,七場「萬眾期待」正是於11月26日谷C欄贏馬,場地性能唔使懷疑,抽二檔守內叠留力,直路隨時一攻而破。