昨日提及施政報告有設立「青年發展基金」之議，幫助青年人創業，每個創業項目如得到接納，可獲貸款十萬至三十萬元。左丁山話不敢樂觀，整個基金最後可能成為納稅人使用一億九千萬元俾青年人玩一至兩年嘅遊戲，不過梁振英話香港要人才，不要外來錢財，十一年間（2003-2014）吸引移民資金超過2000億元嘅投資移民計劃可以一夜之間廢除，一億九千萬算係一個斗零掉落海啦。
近年時興培養青年創業，建制派嘅菁英會、青年聯會有鼓勵創業計劃，中文大學約三年前也推出一個扶助學生／青年創業計劃，至今還在試驗階段，還未見到有乜成績。反而八十幾歲嘅李嘉誠基金會注資嘅投資基金（由周凱旋主理），因為有專業人才、經驗，投資有大成績，英國十五六歲嘅中學生創業就曾得到李嘉誠嘅資金而有所成，現在又有人造蛋項目，之前驚人之作就係老早入股Facebook，你估創業投資係玩泥沙咩，將來呢個青年發展基金肯唔肯虛心向周凱旋學習呀？
經濟日報（一月十六日）A16版報導太古地產之bluepink創業加速計劃，有11家公司入選，免費使用太古地產提供嘅太古坊一萬呎免費工作間，開展新事業，睇吓啲公司創辦人及來頭（有包括英國政府首席科學顧問在內），便知道國際精英雲集，係嚟真嘅，唔係玩玩吓嘅。搞創業，唔駛政府出錢扶助，有個健全自由營商環境就得，政府若有意幫助三十歲以下人士創業，其實唔駛搞甚麼委員會，透過甚麼NGO，只須將一兩億元交俾一個有經驗嘅基金去負責就得，基金以商業方式經營，收足市場水平嘅基金管理費及carried interests（即免費獲得投資項目若干股權，以20%為上限），以七至十年為期，到期就將基金所有權益扣除費用之後，悉數交回俾政府。政府其實可以搵五個基金，每個投資一億，總共五億，講明係投資於本地三十歲以下青年人嘅新創辦事業，包保五個基金經理為賺錢為名譽，一定全力以付。呢個主意左丁山十幾年前已經講過寫過，總係人微言輕，冇人聽，依家政府肯出錢，但竟然交俾委員會及NGO負責，根本就係不知方向，一定輸錢。鬼叫香港特區政府每年盈餘驚人咩，輸錢無人理會㗎！