四歲馬系列呢日由第八場香港經典一哩賽揭開序幕，呢項本地一級賽結果告東尼同郭能合作做到齣好戲，「美麗大師」用番之前贏馬跑法，留住爆一段，結果末段於大外欄越衝越行，成功爆10倍冷win，以二又四分一身位之先勝出。
至於一對灰馬，首、次熱門灰色神獸「和順超影」同「大印銀紙」，鬥落完全唔係「美麗大師」嗰皮，輸到離行離列，只分別由雷神同韋達跑第二同第三，第四名則係大摩之「魔法豪情」。其中雷神同大摩上季憑「步步友」奪標，今季則雙雙衛冕落空。莎莎老闆郭少明家族繼2010年憑「締造美麗」稱王後，事隔五年以「美麗大師」重溫舊夢再奪經典一哩賽。
講番告東尼，呢日先憑頭場14倍「萬事欣」旗開得勝，今場再贏10倍「美麗大師」，自製156倍馬房孖寶，其實「美麗大師」係全場唯一在港曾勝田草千六米之馬，仲要贏過兩次咁多，有10倍絕對係超賠率。