自比「白宮發言人」嘅新聞統籌專員IC馮煒光，終於有拖拍唔再dry爆，難怪噚日以「個人身份」出席港台節目《城市論壇》時春風滿面，甜絲絲向八方透露女友係「飛人」，唔好以為係空姐喎，只係女友鍾意玩滑翔傘箒，噚日亦因為「飛咗」而無法捧場，但馮煒光依舊隔空發放「愛的宣言」。
隔空表白恨娶心
其實去年曾被八方影到單拖去睇戲兼行書局嘅IC，原來喺早前脫離單身行列，有傳媒元旦日見到佢同一名女士十指緊扣睇《歌聲魅影》音樂劇，但當時IC堅稱單身，截至前日先肯同八方報喜話蜜運嘞！
八方噚日喺《城市論壇》問IC，點識到女友？拍咗幾耐拖？係咪元旦手拖手嗰位？佢都怕怕醜支吾以對，淨係透露對方玩滑翔傘，笑言：「我飛上天識……」八方唔知佢係咪用呢種馮氏幽默，冧掂女友，但明顯都有少少恨娶的心。
話說節目期間，《學苑》前副總編輯王俊杰以指腹為婚、盲婚啞嫁形容中港關係，仲打個比喻問IC：「如果要你同（民建聯議員）蔣麗芸結婚，要你義無反顧愛護佢，你肯唔肯？」IC當然冇正面回應，但被人問多兩問突然趁機表心迹：「我同任何人結婚都會好忠誠。」啱啱自爆有拖拍，咁快就諗結婚？唔知佢嘅「飛人」女友，受唔受𠱁呢？
李八方
mailto:[email protected]