雖然施政報告公佈後好多嘢要跟進，但係發展局局長陳茂波噚日都暫時放低公務，朝早去到啟德郵輪碼頭，參加「香港賽馬會特殊馬拉松」活動，除咗拍住馬會副主席周永健同社會福利署署長葉文娟擔任主禮嘉賓，仲親身落場同智障人士一齊跑㖭（圖）。
原來今次活動吸引咗約三千人參加，選手仲係嚟自內地、台灣同澳門㖭。最後喺一公里嘅「名人共融跑」組別賽事中，平時好鬼唱得嘅周永健，唔知係咪平時練歌有功夠長氣，第一個跑出；據聞返工前朝朝起身跑步嘅陳茂波亦唔弱，緊隨周永健其後。但周永健喺起步時，明明叫大家放心，話自己一定「墊底」，唔通係佢使出嘅心理戰？