有人話相信香港政治人物承諾都係傻嘅，都啱嘅，因為佢哋人前人後講反話，例證689。其實同一個邏輯都可以用喺瑞士央行身上，上星期四突然放棄同歐元聯繫滙率掛鈎，令市場明白央行都反口。今次瑞士央行變臉仲向市場埋下藥引，預視歐洲央行星期四公佈加碼放水，將會係一個更大嘅震撼彈。
瑞士央行今次U-turn，放棄維持三年嘅掛鈎政策，又降低指標利率至負0.75厘，令上星期四瑞郎兌每歐元曾經十分鐘內抽升39%，係G7國家貨幣市場中罕見。瑞士央行違背承諾，市場得到嘅教訓就係央行會食言。佢係全球信譽良好嘅央行之一，但今次行動引證央行嘅承諾話變就變，即使股滙市重挫都話之你，喺現時負利率、高負債同經濟龜速增長嘅時代開咗壞先例。
今次瑞士央行亦證明環球央行面臨前所未有嘅壓力，央行並非能人所不能。各國央行搞得掂通縮風險？都係唔好期望有奇蹟發生，大家可以睇睇日央行同歐央行呢對難兄難弟。瑞郎跟歐元掛鈎又點？瑞士最新通脹率跌至0.3%，係二零一一年十月以來最低。同時，又整多隻油價暴跌嘅黑天鵝，歐元跌到九年新低，瑞士央行被迫不斷買歐元，外滙儲備佔GDP比率增至七成。與其同歐元攬炒，瑞士決定早走早着。嚟緊歐央行星期四議息，大家都估緊係擴大買債計劃，但瑞士央行突然扯白旗，歐央行有機會公佈令市場意料之外嘅貨幣政策。
C+B
本欄逢周一刊出