查實贊助咗渣馬四年，特步（1368）首席財務官何睿博都話公司有意進軍香港市場，首先就係今年渣馬當日預備多啲貨賣，試吓水溫先，如果香港人接受到特步，公司就有計劃喺年內推自營網店進軍香港。
咁點解唔索性喺香港開番間舖呢？何睿博就話，香港租金壓力大，對手李寧（2331）試過喺香港開咗間舖唔夠兩年就執咗，要蝕成千萬開舖做宣傳就唔太值得。
佢仲好老實咁講，香港市場點搞都好，對公司喺內地幾十億生意額嚟講，都係冇乜影響力，重點始終係內地市場。
佢仲話喺內地體育品牌嚟講，比較有實力嘅已經得番佢哋同安踏（2020），好似361度（1361）咁已經偏向行兒童路線，喺競爭減少下，公司同店銷售已經見到增長，連今年第三季訂貨會氣氛都有轉好，對公司幾有信心咁喎。