政府日前漏夜宣佈，特首同全體政治委任官員嘅薪酬回復至二○○九年水平，高官變相加薪後，坊間唔少反彈，以特首梁振英為例，月薪由三十五萬一千八百蚊加兩皮至三十七萬一千八百蚊，好多人都話以佢嘅表現，唔值得加人工喎。民間團體「107動力」成員反對加薪，噚日戴面具扮「梁振英」，喺街頭拉起「$371,000」橫額，仲即場設置大紙板，畀市民填上特首值得收取幾多錢人工。平時簽名運動，市民未必好感興趣，但一講到錢似乎大家都好肉緊，有人寫上「$689」，有人認為佢一文不值、甚至「負$100」。當然都有人出手闊綽啲，話都值得攞一萬、五萬或者十萬月薪，但支持佢攞卅幾萬嘅就冇乜囉。