擁有不俗身材嘅公民黨副主席陳淑莊Tanya，噚日出席婦力動力基金搞嘅慈善競步賽，佢話自己曾經係超過一百三十磅嘅肥胖女，「試過我入𨋢時，架𨋢會搖，加上自己身體唔好，所以決心要減肥」。佢以過來人經驗建議想減肥嘅女士，話要把握二十五歲前嘅黃金時間，因為身體嘅新陳代謝快，減都減得快啲。
Tanya噚日拍住專注爭取少數族裔權益嘅社運女神碧樺依、以及全港女子競步第一名吳秀雯，同埋婦女動力基金主席金佩瑋，四人挑戰至尊接力賽，四人有姿勢有實際，最終得到亞軍。
但今年慈善競步賽並非一帆風順，大會原本印製咗三百件T恤作為大會服飾，但卻遭內地海關扣起，令參加者噚日要改穿去年嘅T恤。基金助理發展幹事郭家齊話，T恤紅底螢光綠字，冇任何政治口號或雨傘圖案，對原因感到大惑不解。婦女動力基金推動婦女權益，曾就婦女不獲強積金保障發聲、又批評關愛基金將社會問題責任推畀大商家，唔通咁都激嬲阿爺？
