劉嘉玲、梁家輝同謝君豪喺灣仔演藝學院演出舞台劇《杜老誌》，前晚係第三度公演嘅頭場，蔡一傑、財政司司長曾俊華同老婆、自由黨榮譽主席田北俊同老婆等，都有去捧場。嘉玲日前放咗張素顏相上微博，前晚就着晒舞台戲服，個感覺真係唔同晒，不過年近半百嘅女星放自己冇化妝嘅相畀大家睇，呢份勇氣確實唔係個個有，網民讚49歲嘉玲依然好省鏡。嘉玲話：「化唔化妝都需要面對真實嘅自己，唔可以逃避，要接受自己，素顏都有素顏嘅靚，一起身化晒妝，瞓你隔籬嗰個都嚇死啦！」唔會嚇死老公梁朝偉嘅嘉玲，自爆偉仔係佢嘅白老鼠，有新產品第一時間捉偉仔幫手試。
獲收購壓力大
至於嘉玲做咗幾個月嘅護膚品公司嘉玲國際，有上市公司收購，成事嘅話可以袋億幾，嘉玲開心咁話：「係真係有呢個好消息，對我好大鼓勵，短短三個月有咁好嘅反應，不過壓力好大。我用咗幾十年化妝品，都算好有心得，由材料到包裝推廣，我都可以畀到專業意見。」
撰文：馮仁昭