近排頻被傳聞撤換，連博彩公司都開出大熱盤口，賭佢捱唔到年底嘅渣打集團行政總裁冼博德，原來上周五靜悄悄嚟咗香港，同行者仲有亦被《華爾街日報》話，遭股東逼宮換走嘅主席莊貝思㖭。
華華聽聞，當日午飯時間，佢哋連同渣打亞洲區行政總裁白承睿、大中華區行政總裁洪丕正、香港區行政總裁陳秀梅，一行人浩浩蕩蕩，喺交易廣場附近、渣打嘅新旗艦店富臨閣出現。
原來集團每年年初，例必喺新加坡舉行領導團隊會議，上星期初，管理層就喺獅城搞完呢個會議，大隊人順道過嚟香港。聞說冼博德同財務董事賀方德，上周五仲同百幾個本港管理層團隊，舉行Down Hall Visit。
渣打企業證券啱啱先喺香港裁員一百人，咁難得見面，大班有無安撫下員工？據聞冼博德只係重申，敦促各單位要致力達標，同埋做番靚個股價，雖然大會設有答問環節，但當然現場無人夠膽問，仲有無下一輪裁員行動啦。