金管局呢個月底就會派發外滙基金成績表，高層仲一早預報埋，外滙投資可能損手㖭。近年外滙基金搞多元化發展，另類長期投資項目好似私募基金及房地產，回報就相當唔錯。華華聽聞，舊年七月喺美國進修期間，突然離職嘅金管局前直接投資主管許龍鶴，就係負責呢類投資環節，佢嘅空缺到𠵱家仍未填補番。
不過有市場中人話，呢位有一排無喺港現身嘅韓籍專才，最近又喺業內場合及創投論壇上蒲頭，蠢蠢欲動，據聞佢有意擔當顧問角色，將一些私募基金，穿針引線帶去區內大型機構投資者或主權基金之類。
許氏喺二零零八年加入金管局儲備管理部，之前做過JP摩根、滙豐等，有十幾年投行經驗，所以私募基金界都識佢。
金管局就話，希望能盡快物色到合適人選填補空缺，目前由助理總裁（儲備管理）兼任有關職務，確保投資活動日常運作不受影響。