日本偶像不嬲唔襟擺，尤其一眾整容女星，當副尊容日久失修後簡直驚過哈囉喂，好似八十年代出道嘅工藤夕貴，冇見一排再現螢光幕，點知又玩變臉，驚嚇程度屢創新高。
現年四十三歲嘅工藤夕貴入行卅二年，想當年同中山美穗、南野洋子、淺香唯都係人氣偶像，之後轉sell演技進軍荷李活，先後參演過《藝伎回憶錄》（SAYURI）、《火拼時速3》（Rush Hour 3）等，近年已甚少亮相日本公仔箱。上星期，工藤夕貴上NTV台嘅綜藝節目，呢集搵嚟嘉賓彈日本男人，電視台竟然用國際派美女形容工藤夕貴，唔講猶自可，佢今次露面個樣似老咗廿年，疑似整容失敗帶嚟嘅後遺症。
查實工藤夕貴幾年前開始變臉，前年膠面現身已經被指整容失敗，今次再度變樣連觀眾都話嚇親，有整容醫生即刻抽水，估計佢打Botox加埋手術費起碼用咗十二萬港幣，花咁多錢結果搞到毀容，呢啲咪叫反面教材囉！
撰文：李村姑