【本報訊】農曆新年新鈔要到下月十日始正式換取，市民大多表示會到銀行兌換，金額約數千元，與去年相若，主要以二十元為主。本報昨日透過電話成功訪問129名十八歲或以上人士，其中62%受訪者表示，今年主力換廿蚊紙作封利是用，兌換十蚊紙及五十蚊紙則佔16%及15%，其餘8%屬高消費一族，主力兌換一百元或以上鈔票。另外，逾六成受訪者表示，今年換鈔金額與去年差不多，至於較去年多的則有18%，其餘22%的預算較去年少。
市民楊小姐表示：「今年會換多少少新銀紙去封利是，大約會換萬幾兩萬蚊啦，查實人工加得好少，係股票叫賺到啲，所以鬆動啲啦，而且身邊朋友又多咗小朋友呢。會換五百蚊、廿蚊咁啦，多數以廿蚊為主，同埋會去換滙豐銀行嘅新鈔，覺得好睇啲囉！」
薛太（圖）表示：「年年都有換開新銀紙，今年應該會都換，大約換四千至五千蚊，多數就換五十蚊紙幣，因為親戚比較多。對比上年來講，又冇話闊綽咗同減少咗。」
■記者陳家雄