衰家食尾糊，輸足大半日之韋達，尾場二班千八米憑大熱門「直震撼」勝回一仗，13屆冠軍未致於太過冇面。呢匹法國2000米表列賽冠軍，上仗加程即贏三班千八米，133頂磅直路內閃都照樣輕勝開齋，擺明大超班，今場跑高一班，用番留前鬥後跑法，拉士一撻着引掣，即刻反先葉廐「得盛」取得連捷，遺憾馬主鞋王Le Saunda老闆李子彬家族呢日未竟全功，皆因第三場「誰可拼」連捷唔到只得第二。
「直震撼」可以跑第八場經典一哩賽，不過高伯新唔想佢與「大印銀紙」同室操戈，於是改報尾場二班千八，名義上叫做捨難取易，實際上千八米比千六米有把握。贏埋呢場之後，將評九十分以上，篤定入選打吡。
今場二至四名有冷有熱，18倍「得盛」跑第二，9.3倍「包裝鬥士」第三，第四名係58倍「勁趣」，後駒由馬會前主席黃頌顯擁有，匆出換雷神拉士一衝得第四，矛頭都係指向今年打吡。
高伯新說：「『直震撼』忠心準繩，且鬥心極強，今仗韋達發揮出色，我對人馬表現十分滿意，牠下仗將會跑同程1800米香港經典盃，然後直指打吡大賽。此馬的性能偏長，打吡2000米一定合發揮。」