雖然梁振英新一份施政報告推出唔少新政策，例如有個新嘅置業階段，又開水喉整個基金幫青少年創業，但最終最受外界關注嘅卻係港大學生會刊物《學苑》係咪一如梁振英所講鼓吹港獨，以及究竟梁特口中嗰位五歲女童係咪真有其人。花生友聽聞唔少官場中人對焦點最終落在呢兩個範疇「無符」，話晒係梁振英嘅施政報告，佢鍾意點sell就點sell，大嘆司局長都係但求多啲人關注報告嘅具體項目，否則佢哋如何跟進都白費心機。
以房屋主打嘅呢份施政報告，毫無疑問兩位相關政策局局長，包括運輸及房屋局局長張炳良以及發展局局長陳茂波，嚟緊肯定有排忙，要幫梁特兌現承諾。但查實呢兩位局長外，有位局長都要喺短期內「交功課」，忙碌度遠超預期，咪就係勞工及福利局局長張建宗囉。
梁特為咗爭取基層支持，所以喺唔推出全民退保下，成立五百億基金做退休保障，當係向市民交吓差。但呢個基金除咗有數額，其他如點用法其實十劃未有兩撇。有官場中人話呢壇嘢好棘手，細節有排研究，但佢留意到最搞笑係，財爺曾俊華喺施政報告出爐當日接受傳媒訪問就即時交波，話勞福局會就基金用途同細節進行深入研究，唔太主動幫拖咁噃。
咦，財爺同梁振英一向有施政上分歧，到底係財爺唔想為退保上身，覺得呢個基金搞嚟多餘？抑或唔想幫CY攞分？花生友反而想知，如果肥仔張幫CY搞退保搞得企企理理，下屆CY若然連任，唔知CS呢個位，肥仔張係咪有機？
花生友