佔中後出台嘅2015施政報告，到處睇到對付青年嘅影子，梁振英政府一於軟硬兼施，利用教育局配合，務求要搶回青年陣地。
硬招最明顯，就係提升批判本土主義高度，點名港大學生報「學苑」，指「學苑」有鼓吹港獨之嫌，好多人如左丁山一樣，幾十年冇睇過「學苑」，都唔知呢份學生報講過乜，當然唔知道佢怎樣鼓吹港獨傾向。老實講，七百萬香港人絕大部份係現實派，當中有幾多人支持港獨吖，但經梁振英以特首身份品題，嗰本「香港民族論」立即到處買唔到，傳媒爭取採訪「學苑」前總編輯，紅晒㖭。如果梁振英想話爭取青年人支持嘅話，不用幻想咯。
施政報告本來有好多「糖果」可派，但梁振英既然重炮批判「學苑」，「文匯」「大公」重點報導，咁就扯散晒注意力，向泛民提供政治彈藥，諗真其實係幾笨嘅「公關破壞王」，馮煒光、邵善波、邱騰華、王卓祺等大內謀臣點解會度出呢條橋？唔通其實係故意講俾北京聽嘅交心策略？
左丁山以前做過創業基金董事，好明白hi-tech hi嘢，low-tech撈嘢嘅道理，創投基金投資十單有九單半蝕本，靠一兩單有突破嚟發圍，中間還要倚賴運氣成份，你估真係次次目光如炬咩？呢次政府提出成立三億元「青年發展基金」，更新初中史文課程，向每一間學校派十二萬元去搞內地交流（總額為一億九千萬元），就係政府巴結青年嘅軟招，並且係「青年心理暗戰」。呢啲招數是否有成效，唔緊要，政府為咗達到目的，根本當納稅人金錢四億九千萬係流水，使咗就算。左丁山可以在「青年發展基金」方面講多幾句，呢個基金以配對方式支持非政府機構（NGO）協助青年創業，每宗申請貸款10萬至30萬元，特別係要扶助互聯網科技業，一切程序會諮詢青年事務委員會後審訂。NGO素來不懂投資，無商業發展經驗，由NGO派貸款，牙煙到極。青年事務委員會內可能有生意人，但未必有投資新企業（start-up）嘅經驗，由佢地去制訂審批準則，從嚴則等於攬住荷包不放，從寬則等於社會主義派糖，左丁山唔敢樂觀，況且創業資金，30萬元喎，辦社會企業都未夠，點算真正做生意呀？年青人如要發創業夢，千萬小心，否則一時衝動借到十幾二十萬去創業，因住輸晒，年紀細細就欠下一身債！