去飲茶，最鍾意唔同點心點唔同醬油，費清覺得蝦餃最啱點辣椒油（圖）。但如果去咗荃灣好彩海鮮酒家，就唔可以喇，事關有讀者爆料，話去嗰度飲茶時，叫咗蝦餃，諗住叫碟辣椒油，點知阿姐淨係畀辣椒醬，「淨係叫潮州粉果先有辣椒油㗎」。
費清同事花生友聽到呢單case，即刻好似遇知音咁，「係呀，我都試過。其實潮州粉果都唔係大點，蝦餃咪仲貴」。唔通好彩大廚係食神，認為辣椒油同潮州粉果先係絕配？唔想拆散佢哋？
荃灣好彩海鮮酒家經理蔡先生承認，因成本問題，公司規定只有食潮州粉果，先提供辣椒油，其他點心只有辣椒醬，「辣椒油成本比辣椒醬多五、六倍」。
醬油呢家嘢，費清真係識條鐵，所以就向添好運點心專門店老闆麥桂培請教。培哥仔話，食肆常用辣椒醬一樽約十幾蚊，但同級辣椒油就要三、四十蚊；因為辣椒醬會加番茄、醋等其他成份，但辣椒油主要只有油、辣椒，所以辣椒唔可以少，「辣椒唔平，而且祢家啲油好貴。」
佢話客人要求都會照畀辣椒油，「點得幾多吖」，但有啲食肆可能特別用貴價辣椒油。培哥就話自己最鍾意夏銘記辣椒油，費清去問過價，細樽二十七蚊，大樽七十蚊，真係唔算平。
費清最後八到，原來好彩八間分店，只有荃灣、觀塘店有咁嘅規定，因兩間都係用自家製辣椒油，加咗瑤柱去炒，成本比較高。
不過咁，客人有畀茶芥喎，想點吓辣椒油都唔得？
費清 ＃要生計，也要生活 ＃毋忘初衷