今日篇稿，一注獨贏冇交嗌，係佢。人稱「葉伯」嘅葉倫明，乃一介跑夫，香港馬拉松常客。生於上世紀二十年代，七歲時，已經跟住上海著名跑手楊金花學跑步，一跑，跑足八十年，至去年年底過身。葉伯生前豪言，有一百歲命，都會跑落去，惜天意弄人，或神太愛佢，九十三歲高齡離世。
此君今日下午兩點半至三點半，於鑽石山殯儀館二樓慈愛堂，於安息禮同大家say goodbye，之後直接去鑽石山火葬場。
葉伯猛料不妨再提，一九九七年去南非參加奧運元老馬拉松比賽贏過三料冠軍，人老且有黃忠之霸，曰：「不能跑全馬，可改跑半馬，若再不能，便跑十公里。」小弟從無奔走之歷，葉君聖面當然未見過，但跑友朋友，全部當佢大佬甚至教主，所以走卒們發起「跑祭」，呢壇嘢都算係本港體育大事件。
葉伯何來毅力，聽完你都一定覺係天意：一九四九年國民黨敗走，佢坐住隻太平輪，由上海開台灣，遇上鐵達尼式撞船沉沒，千人遇難，葉伯乃僥倖生還三十幾人之一。之後佢用長跑嚟悼念船上朋友及其他死難者，就似《阿甘正傳》，跑出一個傳奇。
三毫子一擔道理，都係兩個字：堅持。知易行難，始於足下，我永遠記得喺金鐘馬路上出現過嘅每一位跑手，一個眼神大家心照，繼續加油。
梁栢堅
填詞人+彩池人