一對共產主義兄弟之邦，今年參戰亞洲盃戰績真係天堂與地獄，中國B組兩戰兩勝篤定首名出線，相反北韓就兩戰全輸提早出局，周日兩兄弟喺坎培拉交手，嚴格嚟講係例行公事；國足呢排咁威風，連索模都瞓身力撐，相反北韓球員連波衫都要自己用手洗，只好眼白白葡萄國足。
「Angelababy」靚相抽水
國足曾幾何時係中國體壇負資產，上年世界盃連小國哥斯達黎加、波斯尼亞等都可以參與，相反十四億人口嘅堂堂大國外圍賽已經byebye，國足真係躺着也中槍，被網民瘋狂抽水。不過踏入二○一五年，國足今時唔同往日，亞洲盃連勝沙地阿拉伯同烏茲別克提早出線，唔少索模都即時搵番件國足波衫影靚相抽水，好似號稱「翻版Angelababy」嘅北舞校花夢妮，就化身國足寶貝着晒中國隊波衫打氣一番，不過互聯網咁發達，打夢妮個名搜尋一下，會發現上年世界盃佢就撐巴西，今時今日就捧國足，變臉快過尚書大人。
另外，足球真係可以打破隔膜，連台灣「乳神」張永歆都影靚相支持國足，不過唔知係唔係台灣搵唔到中國波衫，張永歆就真空上陣，只係用條頸巾遮住兩點，當然男球迷就讚好！
不過所謂英雄難過美人關，國足呢期咁旺，我求大俠都唔希望佢哋因為呢班索女而分心，特別門神王大雷，啱啱先做完老竇。講番禮拜日場波，國足教練佩連就話唔會留手，唔會大幅輪換陣容，事關要爭取國際積分，希望提高國際足協嘅世界排名，之後嘅世界盃外圍賽有得做種籽隊。
北韓兵隨時冇飯食
國足威威，北韓就慘慘，提早出局後返到平壤都唔知會唔會被犬決。但其實做北韓國家隊成員都幾辛酸，據中國《澎湃新聞》報道，北韓每年只挑選五十人加入國家隊，入到隊先有充足食糧，唔係就要兼職做農民、工人等先有飽飯食；而經過訓練如果冇進步，仲會被叮走。為表對國家嘅尊重，北韓球員要自己親手洗番自己件國家隊波衫㖭，不過愛國還愛國，以今屆亞洲盃表現嚟講，就真係冇咩幫助。
識睇，一定係睇足英台【英波Live】：
http://soccer.appledaily.com
http://bit.ly/engballlive