梁振英開始秋後算帳，話外部勢力入侵，干預支持佔中，公開質疑戴耀廷接受捐款，款從何來。不少愛國勢力又不停向香港大學發炮，要求港大徹查偵辦戴耀廷，如果學生識少少現代史嘅話，就知道1967-1974年間，中國發生不少批鬥大學教授、知識分子、老師嘅事情。呢啲嘢會在香港大學重演？真係要鼓勵中學生多讀歷史，嚴家其嘅「文革十年史」係不可缺嘅讀本。左丁山有此意見，就因為同幾位年青記者傾起，佢地都唔知有吳晗、田漢呢啲人物，連林彪係邊位都矇查查。總之係，識歷史更害怕！
聖公會管浩鳴牧師大概要派人到教會屬下DBS（男拔萃）調查吓嘞，問學校點解會種出毒豆戴耀廷，令梁特首咬牙切齒，要生產多啲田北辰呢類優質或愛國學生先至係路吖嗎。去者已矣，來者可追，聖公會加緊監控男拔女拔聖保羅男女等精英學校，至為重要，管浩鳴牧師主管聖公會教省，加強管理學校教育，責無旁貸呀。
聖公會根本就係外國組織，耶穌會亦然，根據左丁山年青時讀過嘅一啲左派反殖言論，所有外來傳教士、教會組織都不是甚麼好東西，係懷着帝國殖民主義心態，到殖民地打着傳道、教育幌子，為帝國主義殖民主義播下毒豆，向殖民地學生洗腦，麻醉反抗意識，安心做帝國順民嘅。故此毛澤東一掌權，就奮起維護民族尊嚴，趕走外國教會及傳教士，連根拔起教會大學，將佢地併入國營黨辦大學，名校燕京、聖約翰與嶺南等就自此消失。聖公會管浩鳴牧師唔知有冇讀過呢段歷史？香港如係納入一國一制之下，教會教育那有容身之地？聖保羅男女會變成香港「八一」中學都唔定。
梁振英更在施政報告嚴厲批評港大學生報「學苑」（Undergrad），創下香港歷史紀錄，香港自有總督/特首施政報告以來，從未在報告內批評學生刊物，總督/特首與學生鬥嘴？自貶身份喎，地位不對稱喎，而且一定犯上控制言論自由之嫌，聰明人斷不會如此。昔日戴麟趾就更放下身段，直情投稿「學苑」，向港大學生解釋政策㖭。梁振英不屑與港大學生報對話就算啦，何必板起面孔鬧人，可見佢自己及身旁謀臣（斷估都係邵善波王卓祺等高人）都欲去「學苑」而後快，視周永康帶領之港大學生會為敵。以前董先生最多係派代表去搵港大校長講兩句（鍾庭耀案），現在索性公然公開批判，別有用心，昭然若揭矣！