評述員聚頭夜蒲，其實有啲似舊同學聚會；大家唔同公司、唔同年代，甚至已經轉換工作環境，但有好多共同回憶。有啲熟識有啲陌生，有啲成熟咗有啲扮後生咗；有啲仍然好長氣，有啲照舊唔講嘢；有啲topic每次都要講多次，有啲嘢又好似發現新大陸。
最鍾意見到「細鬼」，因為佢每次都一定會提番我跑得好快。話說某年喺葡萄牙，我同佢趕住去球場，但偏偏大塞車，我哋忍唔住落車跑。我跑得好快，因為好急，係人有三急，所以跑得零舍肉緊，拋離咗「鬼蛇」一條街。又難怪鋼鐵後衞張志德之後會咁記仇，可能佢真係好少俾人話過就過。
堅哥久休復出，個個同佢合照都要豎起兩隻手指。冇計，呢個係佢嘅幕前icon，每次live完最後一幕都要做，仲要係不斷好kai咁擺動先安樂，同堅哥咪前認真嚴肅嘅形象其實格格不入囉。當年成日坐佢隔籬，為咗唔隨波逐流，我一次都冇跟佢做過勝利手勢，反而會扮老積，模仿新聞主播執吓稿除吓咪。
同學們齊齊長大，好在不時有啲下一代嚟撐場，拉番低平均年齡條curve。記得德能兄幾年前帶咗公子到場，咁啱嗰屆大家搞咗個互選嘅最佳評述獎，德能兄攞獎嗰陣，囝囝仲有得一齊捧盃㖭。呢次就輪到鍾國雄做「帶子雄郎」，可能𠵱家香港嘅小朋友真係早熟咗，二年班嘅佢竟然冇俾我哋班嘈生晒嘅uncle同auntie嚇親，咁都要多得佢手上嗰部智能電話嘅。
不過，我都忍唔住問咗「小鍾仔」一句：「你覺得你爸爸平時講嘢，定係講波嘅時候好聽啲呀？」「平時！」佢唔使望我就已經答咗！似乎下一代真係唔係好明白上一代做嘢有幾艱難，搵日不如搞個「新一代評述員大賽」，專畀各位講波同事嘅下一代參加，咁叻你講吖！據聞鍾志光位公子都好talk得㗎，日後會唔會出現講波父子兵呢？
同學會要熱鬧，女同學好重要，尤其是喺呢間不嬲重男輕女嘅講波學校㖭。因為女仔喺食、玩同做啲乜都特別多提議，令班麻甩佬多番啲生氣。冇咗呢班「球壇慈母」，我估講波同學會分分鐘鋪鋪都係踢波同踢波，悶好多。
KEYMAN
節目主持