二零一四年，是香港充滿「驚喜」的一年，驚的是我們以往認識的公義，在香港已經買少見少；喜的是有不少沉睡的香港人在這年覺醒，為自己爭取應有的權利。經過了累人的二零一四，一向多搞作的創作人卓韻芝決定在二零一五年初回歸基本，在酒吧辦Talk騷「飲嘢叫埋卓韻芝」，跟大家輕輕鬆鬆把酒談歡，阿芝說：「做人唔使吓吓咁用力，要適當時放鬆吓先可以重新出發。」
撰文：文國駿
卓韻芝從來都給人一種「估佢唔到」的印象。果然，她這次所辦的棟篤笑表演，場地及準備亦是「估佢唔到」，她日前接受專訪說：「今次由有搞呢個棟篤笑嘅念頭到決定晒所有嘢只係用咗一星期時間，因為喺上年年尾時突然諗起，二零一四年發生好多事，突然好想回歸基本，做啲簡單唔花巧嘅事，咁啱棟篤笑癮起，所以就做囉，忽然間好想做好細場地，全部人坐得好密咁傾偈，開騷時我可能係素顏、着牛仔褲同平底鞋就衝上台去講啦。」
即興快閃開騷
回顧二零一四，阿芝坦言若果不是香港發生了這樣多大事的話，她也很懷疑自己會否這樣衝動辦這個棟篤笑，有否為今次做騷作特別準備？阿芝說：「自己專登睇咗唔少外國棟篤笑，睇吓點同觀眾互動，睇完會發覺點樣喺成個騷都保持互動同埋咁有能量，真係要取經，不過細場冇乜壓力，票房、廣告海報都唔使煩，我好嚮往隨意即興快閃。」
Talk騷將於周五開始，阿芝說特意選在細場演出：「我一定有全部稿寫哂，但應該就現場氣氛會有唔同嘅加減，到時想講乜就講乜啦！內容一定會涉及工作、恐懼、家人、愛情、鬼古，乜都可能會有。同埋今次特別在於我會主力搞十二點嗰場，當然都會有八點十點畀啲要湊仔或者拍拖嘅人睇，但主打十二點嗰場可以俾人飲完嘢嚟睇或者睇完再飲，香港都冇乜試過凌晨十二點開騷。」
上台大聲恥笑
阿芝開宗明義說明今次是跟朋友傾偈，是否為避開一些敏感題材例如政治等？她坦言：「棟篤笑係越heavy越好笑，或者會笑一啲值得恥笑嘅人，唔會去避免，想講、值得講就會去講。觀眾反應好影響，可能嗰日特定係某一年紀群嘅人嚟，我會講多啲佢哋身邊相關題目，呢個就係同大場做騷最大分別，大場其實只係背稿，今次細場如果觀眾頑皮，台上嘅我可能係更頑皮。」
踏入二零一五年，如何去總結過往一年的香港？阿芝感慨說：「喺二零一四年嘅香港係好難用一兩句嘢總結，我諗我哋終於見到自己係邊個同埋在乎啲乜嘢，係充滿驚喜同驚訝嘅一年，而每一次驚訝都係測試緊我哋自己係邊個，我會話係香港人自我認識嘅一年。」
阿芝又笑言將來希望跟棟篤笑建立長久關係，而寫作及寫劇本亦會繼續：「寫得出就寫啦，我唔會逼自己，劇本如果寫到出嚟就睇吓有冇人願意拍。」至於感情，她則表示完全是零：「冇諗，冇拍拖，冇做，所以係倔頭路一條，我阿婆都知，所以完全冇理我冇催我。」