自從上季雷神、田泰安等輕磅騎師來港發展後，華將嘅搵食空間大大縮窄；好似賴維銘咁，今季暫時只贏過兩場頭馬，本來賴仔今期（18日）賽事將有隻實力座騎「實在威」列陣，但點知隻馬反而搞到賴仔有排唞。
話說剛周二賴仔策「實在威」操練時，隻馬挨向欄邊嘅車轆，啲無情力令賴仔左腳骨裂，要入院治療，短期內冇工開之餘，仲要眼白白睇住「實在威」今期易配上陣，仲分分鐘贏埋！
接手呢隻賴仔受傷「元凶」馬匹嘅騎師，就係英國猛將郭能喇，郭能暫時有27win排第四，今季手風好順，老實講，有佢為「實在威」操刀，戰鬥力應唔差得過賴仔。
講番隻馬，上仗在港初出排大外檔兼慢閘，形勢極惡劣，估唔到走順後直路追回大量失位，輸唔夠三身位，擺明有質素。拼後由賴仔試過大閘，備戰工夫做到百分百，本來今次係賴仔建功大有機會，不過人算不如天算，對郭能嚟講，他日賴仔康復隨時攞番「實在威」嚟騎，今次郭能梗係贏咗先算啦！