甚麼是內幕？瑞士央行突然決定瑞士法郎同歐元脫鈎，可能係近期最大內幕。因為當市場仍然在估歐洲會唔會QE時，瑞士央行嘅決策似乎在暗示：歐洲今個月二十二日會QE。
瑞士央行鍾意玩突襲，去年十二月十八日先公佈行負利率，而且重申堅持瑞郎最低滙率，實行日也就係今個月二十二日。點知突然又公佈四個禮拜前講嘅唔算數，瑞士法郎直接同歐元脫鈎，唔再鎖定1歐元兌1.2瑞郎，所以全世界國家骨子裏都如《九品芝麻官》中吳啟華咁彈出彈入，講咩「堅持」、「貫徹」都不可信。
瑞士央行公佈脫鈎時離二十二日只有七日，正因為公佈得咁急，非常大可能係收到料，歐洲央行當日貨幣政策會議時，會落實推出歐洲版QE。
滙市吹角連營
瑞郎同美元、德國國債、黃金呢類資產一樣，都係屬於市場公認嘅「硬嘢」，一有咩風吹草動就要嚟避險。三年前瑞郎同歐元掛鈎，目的係防止歐洲資金因歐債危機大量湧入瑞士，推爆瑞郎同瑞士樓市。
實行掛鈎後，當錢湧入瑞士，瑞士央行要不停揸外滙沽瑞郎去壓住滙率。結果三年過去，瑞士央行外滙儲備截至去年十二月已增加至4,951億瑞郎，而二零一一年時個數額只係徘徊2,400億瑞郎，足足多咗一倍。滙率壓住，但阻唔到熱錢湧入。
一個有趣對比係，全世界因為歐洲處於通縮邊緣準備QE，紛紛去沽歐元時，瑞士央行卻因為鎖定滙率而變成最大買家。根據IMF統計，全球央行二零一四年削減歐元儲備規模達到8.1%，瑞士成為最後接貨者。
熱錢湧入，瑞士股市樓市大旺，外滙儲備大增，但通脹率卻徘徊0%水平，間歇性連0%都跌穿輕微通縮。從央行角度睇，當然唔希望見到咁情況，經濟麻麻哋、資產價格卻過熱，好容易就會引發金融動盪。
瑞士一個突襲，綜合各種報道，德銀、花旗各蝕1.5億美元、巴克萊蝕1億美元以內、盈透蝕1.2億美元、福匯蝕2.25億美元、Alpari UK及Excel Markets破產。投行、滙行蝕過億，邊個蝕得最甘？正正就係始作俑者瑞士央行。瑞郎脫鈎後，兌歐元急升近20%，瑞士央行因為持有大量歐元外滙儲備，賬面上唔見600億瑞郎。
油價腰斬，銅價破底，農產品暴跌，盧布破地獄，瑞士突襲，全球最大外滙行股價一日插88%。二零一五之所以係大時代，因為貨幣政策準備由量變轉為質變。莊周先生講過魚活在水中而不知有水，過去五年嘅經濟環境令全世界已習慣價格曲線壓平、波動率壓平、孳息率壓平，已忘記自己活在嘅環境係會轉變。但一切只係開始。
Mr. Tregunter