大家就算沒聽過陳詠謙的名字，最近都應該有聽過由他填詞《高山低谷》這首歌，連續兩年冧莊叱咤填詞人大獎的陳詠謙，竟填贏兩大宗師林夕和黃偉文，他雖然現年只有二十八歲，但人生經歷很豐富，讀到港大二年級就停學做和音，二十四歲結婚至今年初離婚，曾經窮到銀行戶口撳唔到錢，到今日搵到閒錢搭的士，陳詠謙日前接受專訪說：「寫歌詞係將自己靈魂切出嚟賣！」
撰文：余燕儀
陳詠謙不似林夕的憂鬱書生型，亦不像黃偉文的浮誇才子，陳詠謙就是鬼馬幽默。十八歲寫第一份歌詞，當時他在商台做暑期工：「有日岑寧兒（岑建勳和劉天蘭女兒、Swing成員Jerlad表妹）打電話畀我，佢話表哥Jerlad想搵人寫歌詞，我寫完之後，嗰晚冇瞓過又病緊，人生唯一一次額竇炎，你知乜嘢係額竇炎？好嚴重㗎，嗰隻歌係李蘢怡同李龍基合唱，出街歌名叫《明天你是否依然教我》唔係我改，我本身歌名叫《百無禁忌》諗住辟邪，第一次寫歌詞已經有新人嘅辛酸，就係唱片公司唔問過我就改咗個歌名囉。」
曾窮到撳唔到錢
提起做新人的苦況，陳詠謙滔滔不絕說：「有份歌詞寫咗八份稿，最後出嚟俾人改到韻又唔押音又唔啱意思又唔通，但寫我名填詞，呢首就係高皓正、鄧穎芝、EO2合唱嘅《大日子》，我唔係嬲人，嗰時諗住要發憤圖強，總有一日啲人改我啲嘢會問過我先，後來慢慢發展到啲人會問我可唔可以改，我話得，我幫你改，你唔好郁我啲嘢就得。」
捱過高山低谷的陳詠謙，寫了《高山低谷》為林奕匡橫掃各電台金曲獎，背後原來有個古仔，他說：「當時幫林奕匡寫呢隻歌，佢唱片公司暗示過，如果呢隻歌冇反應就last，我梗係有壓力啦，最後一餐飯煮畀佢食，所以我假設自己係林奕匡，其實好絕望，呢首歌都係我心聲，我嘅低谷因為有段時間真係好窮，戶口冇錢到撳唔到，打畀人問：『不如畀住少少糧都好呀，肚餓想食飯。』你知啦，行規寫完歌詞大半年先有錢收，試過兩、三個月零收入，冇錢咪乖乖哋留喺屋企寫歌詞，低潮時特別強創作力，哈哈。」
組VEGA一碟即散
現在邁向高山的陳詠謙，填詞是否可以買到樓？他鬼馬說：「買唔到樓，但得閒可以搭吓的士，去兩、三次旅行。」
在港大讀音樂和中文系的他，讀了兩年就停學：「嗰時唔係好想返學見人，又有機會做陳奕迅演唱會和音，把心一橫去做和音，之後又畀Wyman（黃偉文）簽咗做填詞人，好啦，正式投身社會，我幫過陳奕迅、方大同、草蜢做和音，如果唔係飯都開唔到。」陳詠謙由和音唱到其後組樂隊VEGA，可惜只出了一張碟即玩完：「自己冇乜信心再加運滯，你都估到唔成事，好快拆夥。」
詞作超過二百首，與歌手合作各有火花，陳詠謙說：「陳奕迅永遠唔改人歌詞，佢最正係你畀乜佢，佢只諗點唱好，佢係嗰種除咗尊重之外，唔會將責任推喺人身上；周柏豪需要喺自己音樂上擔當主導角色，佢睇完會話：『陳詠謙，呢份歌詞知道你點解咁寫，但你諗吓如果係我唱，你又會點寫？』我就話得、明，咁我郁少少改少少，有時佢話呢個字眼唔想唱，我咪話想試吓新嘢，佢話呢句唔明，我叫佢唱咗先，出咗街會明，我哋有呢種互信。而《字花》係第一次同薛凱琪合作，寫咗四份稿，最後用番第一份稿，嗰時好笠水，交咗歌詞，歌手話可以再好啲，我：『哦哦哦』，唯唯諾諾，佢睇完幾稿後，叫我解畀佢聽，佢聽完問點解唔一早講。」
欣賞黃霑Wyman
至於欣賞的填詞人，林夕、Wyman、周耀輝、林振強、黃霑都是他的偶像：「但真正令我毛管戙係李宗盛，《我是一隻小小鳥》歌詞：『所有知道我的名字的人啊你們好不好 』係好有型，佢用最淺易文字親和語調去講最警世道理，如果我有日做到就真係犀非利，佢能夠寫到係經歷豐富。」曾停學又離婚的他都經歷豐富，會否寫首歌講自己的失敗婚姻？陳詠謙無奈說：「二十四歲結婚，今年年初離婚，從來覺得寫歌詞係將自己靈魂切出嚟賣，某程度上係抒發，但將有關嘅人靈魂都切出嚟係出賣佢。」
場地提供：焱丸水產