標準工時立法爭拗月底會進入戲肉，因為標準工時委員會將會開會，討論政府委託顧問公司進行嘅標時研究，政府立法與否，到時應該有啲眉目。但喺呢個時候，標時委員會委員噚日突然收到政府通知，佢哋嘅任期到明年四月八日就屆滿。政府正式為委員會定下「死期」，引起委員唔少聯想，有勞方代表話，雖然政府最初成立委員會時提過委員會任期三年，但一直冇提具體完工日期，𠵱家距離二○一六年四月有超過一年時間，突然提醒委員任期幾時完，似乎暗示政府無意為標時立法，因為如果有心立法，委員會肯定需要繼續保留，以預備一連串立法工作，就好似當年成立最低工資委員會一樣，如果明年就「功成身退」，標時立法好可能凍過水。