今次心水係本周重頭戲，曼城明晚招呼阿仙奴。主隊冇耶耶，加埋另外兩大支柱高柏尼同阿古路傷癒冇耐；睇吓被譽為英超半季最佳球員嘅「山神」阿歷斯山齊士（圖），可唔可以幫阿仙奴破到近年鬥強隊多腳軟嘅魔咒。受讓半/一，取下盤。
曼城上仗鬥愛華頓失兩分；高柏尼啱啱好番坐後備席，阿古路傷咗超過一個月，後備落場射過兩腳唔中框，不在狀態。藍軍最受影響，都係冇咗要返非洲打國家盃嘅隊長耶耶托尼；難得耶耶去年尾回勇，幫曼城喺近十場聯賽贏咗八場，入咗六球，令曼城一度追到同榜首車路士同分。但曼城喺呢十場和咗兩場，正正係冇耶耶在陣；原來自從今年四月，冇耶耶，藍月未贏過聯賽。
好多波友都知阿仙奴近季唔識贏所謂Big 4球隊，對上一次鬥強隊係補時去到七分鐘，俾主場嘅利記逼和2:2。近季問題可能係鬥強隊照重主攻、同防中欠級數，得一個老將法米尼或者阿迪達，做第一道屏障，頂唔住列強嘅反擊。
捧場當然要有變數，先有月頭先返嚟嘅高基連，喺英冠磨鍊過，硬淨咗好多；佢踢咗四場正選，球隊三勝，不論拍邊個打雙防中，呢位法國小將都係做咗「大丈夫」，話唔出就唔出，呢四場亦只共錄一次射門。仲有後防又有番法國中堅哥斯尼，放心好多。
另外，客軍當然要靠喺《天空體育》投票為英超最佳嘅山齊士；過咗最難捱嘅去年年尾快車期，山神仲fit，同辛迪卡索拉非常合拍，𠵱家球隊中前場人腳係近月最充裕。若果藍月專人盯緊，今季已有七次助攻嘅山齊士亦可轉為鋪橋搭路，博下盤之餘，波膽取2:2、1:2。
修頓不設防讓唔起
睇狀態，博紐記主場反底，鬥車仔未失波前踢得好好，繼續無帥似未受影響；修咸頓踢埋周中場足總盃，傷埋雲耶馬，中路防守冇人能代，讓唔起。另外，水晶宮換帥打護級，戰意回升，今季作客十一戰只輸過四場和咗六場，作客般尼，直取和局。
波神
神級攻略 智破足彩
識睇，一定係睇足英台【英波Live】：
http://soccer.appledaily.com
http://bit.ly/engballlive