周四騎士作客湖人，又到大家欣賞兩代「NBA第一人」勒邦占士（LeBron James）同拜恩（Kobe Bryant）較技嘅時候。雖然兩位全場都有講有笑，但打波時絕對唔兒戲，占士個人攻入三十六分，帶領賽前已經累積六連敗嘅騎士贏109:102，就算主場嘅拜恩以十七個助攻刷新個人職業生涯紀錄都冇用。
拜恩變身助攻王
本身係得分後衞嘅拜恩今場又控衞上身，負責埋分波，全場交出十七個助攻，多過晒騎士全隊嘅十四次，仲創出個人職業生涯新高；連埋十九分嘅進賬，拜恩今場又造出「雙雙」，可惜對住有大帝占士發威入三十六分嘅騎士，都係逃唔過輸波嘅下場。
唞咗兩個禮拜之後，大帝連續兩場都射入超過三十分，今場終於贏到波，幫球隊中斷六連敗，今季勝率亦上番五成。不過，大帝今場都曾經燒鬚：呢位六呎八吋高嘅小前鋒，第二節一次大力入樽炒粉，唯有以笑遮醜，但都俾拜恩嘲笑。唔止咁，已經三十六歲嘅拜恩，仲叫上個月先過三十歲生日嘅大帝做老嘢㖭；不過都係講笑箒，佢哋兩位全場都談笑風生勁輕鬆，唔知仲以為佢哋打緊友賽。
大帝早兩日先俾八卦網站《MediaTakeOut》影到佢去幫襯修腳甲，見到佢啲腳趾變晒形，睇怕都係多年嚟打波損耗太大，日積月累而成。
識睇，一定係睇足英台【英波Live】：
http://soccer.appledaily.com
http://bit.ly/engballlive