特區政府開口埋問要聽年輕人聲音，噚日公佈嘅經濟發展委員會新成員名單，都有搵富豪太子加入，包括新地前聯席主席郭炳江嘅仔郭基煇、俊和發展集團副主席彭一邦，兩人上位原因好唔同，郭基煇真係臨危受命，要代父出征投身公職；彭一邦就成功靠反佔中博到上位，終於等到回報。
俊和副主席成功博上位
八方先講郭基煇。有商界中人同八方講，郭氏兄弟受官司困擾開始，已急於部署年僅三十出頭嘅郭基煇接班，二○一○年新地委任郭基煇做董事，已經預咗佢要盡快接替父親郭炳江工作，而且唔只係家族生意，仲有政治人脈，所以舊年十月全國政協副主席董建華帶班香港富豪上京，面見國家主席習近平，郭基煇算係郭家代表，家陣入埋經濟發展委員會，相信係要開始接手郭家政治資產。
彭一邦就同郭基煇有別，佢似乎真係有心博上位。彭一邦「代表作」係舊年十月，以有啲院校學者同學生參加佔中，破壞繁榮穩定同令社會分化為由，cut咗俊和畀三間院校嘅獎學金，結果「一鳴驚人」，因為事後被踢爆，原來俊和獎學金得兩萬蚊咁大把，即刻俾網民笑。不過慳呢筆濕碎錢，就搏到政府賞識，拎到個經濟發展委員會委員做，俾網民笑吓有乜嘢所謂，八方估唔到嘅係，原來公職「價碼」咁便宜。
另外八方不能不提埋金發局公佈嘅新委員，當中新貴「海歸」張磊，相信香港冇乜嘢人識佢，實情佢係董建華愛將，老董搞中美交流基金時已相中佢，拉佢做團結香港基金會顧問，上京面聖時更陪伴左右㖭。
李八方
mailto:[email protected]