中六文憑試得八千幾人報考嘅中國歷史科，突然間成為熱門話題，唔少人主張將中國歷史科列為中學必修科，左丁山素來贊成如此，但現實啲講，自中學改制之後，學生已有四科必修，若再加多一科，學生、老師、學校都會唔鍾意，若將通識科改為選修，中史為必修，就更加會掀起一場政治風暴，梁振英有冇咁大決心，為中史科押上個人政治資本，大有疑問。
唔將中史列為文憑試必修科，在初中中史加入現代史比例，由現時三分之一增加至五成，相應減少古代史比例，如課程發展委員會專責委員會主席梁元生教授（中大文學院院長，歷史專家）所言，是否可行？（按：施政報告已表明如此，並會將中史課時加倍。）要做就冇話唔得嘅，係一個取捨問題啫，學生識少啲隋唐宋元明清，識多啲辛亥革命、北洋軍閥、抗戰與國共內戰以至文化大革命，打倒四人幫等佢地了解多啲中華人民共和國之來由，未嘗不是好事，但當然人人會有不同意見，爭論在所難免。
特區政府突然咁熱心講歷史教育，梗係與佔中有關啦，陳佐洱在北京發炮，話香港學生要「補腦」、香港教育要考慮國家安全，教育局要受北京監督，充份顯示北京一啲左派見到咁多香港年青學生參加佔中，心裏急了，向特區政府施壓，「奪回教育陣地」，不要將教育成為陳佐洱眼中嘅「苦瓜毒豆」，種出佔中行動。呢位左王對香港教育認識不清，或者可當作耳邊風，但本港最大辦學團體聖公會教省秘書長管浩鳴牧師又響應話：港生對內地看法有很大落差，以致有些人覺得中國被妖魔化，會跟教育局商討一下。呢位管牧師在聖公會管教育，對聖公會學校有影響力，言論重要好多。聖公會屬下名校如雲，如聖保羅男女、聖保羅男校、拔萃男校、拔萃女校、沙田曾肇添中學、大埔莫壽增中學，由中環至新界地區都有聖公會名校，家長爭相為子女報名入讀，入到就好似中咗六合彩，可見聖公會對本地教育影響之大呢，偏偏就係男拔女拔學生校友首先刊登廣告撐佔中嘅，管浩鳴或者唔知點向中聯辦交代啩。學生妖魔化中國？聖公會學生有冇咁做先，管牧師又有冇下令男拔女拔聖保羅唔好教出「毒豆」先？如果聖公會學生問管牧師：點解溫州漏夜強拆教堂，基督徒受壓無處申訴？管牧師會用甚麼中國歷史經驗嚟回答呢？管牧師若人在溫州傳道，會唔會咁生活輕鬆呀？識得答就會明白，香港學生對中國現代史愈係知多啲，愈係害怕。