亞視員工繼續被欠薪，十二月份糧至今未有着落，偏偏幾個股東又鬥氣唔肯泵水。為咗舒緩財政壓力，亞視管理層就以亞洲會名義，喺下星期五（一月二十三日）晚上七點半，喺大埔亞視總台搞咗場「萬眾同心撐亞視」義演晚會，希望各界可以踴躍捐錢，幫得幾多得幾多。
究竟個晚會有乜嘢嘉賓出席？有乜嘢表演？亞視就冇交代，但據了解應該就冇乜嘢天王巨星會出席撐場。如果真心想做善事幫吓亞視班員工，有乜嘢途徑？亞視就提供咗一條聲稱廿四小時熱線2992 8336，大家可以隨緣樂助，多少唔拘。
八方覺得「萬眾同心撐亞視」呢句口號熟口熟面，google一下，原來係每年一度「萬眾同心公益金」嘅進化版。