我求大俠幾時都話，在家千日好，費蘭度托利斯（費托）重返母會馬德里體育會後，只不過踢第三場波已經重拾射門鞋，周四西班牙盃十六強次回合個人梅開二度，作客2:2賽和皇家馬德里，幫馬體會晉級。可憐皇馬衞冕失敗，新科金球獎得主基斯坦奴朗拿度（C朗）既失盃，仲傳佢承認埋失戀，今次做咗雙失球王㖭。
起孖助馬體會晉級
費托一月以借將身份重返馬體會，今仗只不過係佢第二次正選，不過都可以打破佢自己喺巴拿比奴球場入球荒，只花四十六秒就先開紀錄，亦係皇馬歷來西班牙盃主場比賽最快失球。皇馬首回合已經輸0:2，咁快就主場再失，變相起碼入四粒先有出線希望，雖然沙治奧拉莫斯二十分鐘追番一粒，但後防實在太爛，換邊後三十五秒又失守，今次入波又係費托。
皇馬再度落後，就算C朗追成2:2，不過都未能挽回出局命運，馬體會以總成績4:2晉級，八強對兩回合大數艾爾切九球嘅巴塞隆拿。費托賽後興奮咁講：「今日係美妙嘅一日，今次係我返嚟馬體會頭兩個入球，我之前亦都未試過作客皇馬入波，我會好好享受勝利。」
C朗認同艾琳娜分手
C朗周一先拎金球獎，威風八面，周四就遇上挫折，皇馬今季繼季初西超盃輸畀馬體會後，再失一盃；C朗失盃外仲失戀，英國《太陽報》引述葡萄牙報章話，C朗已經同家人講，正式同俄羅斯模特兒女友艾琳娜分手，結束接近五年嘅戀情，當然C朗𠵱家先廿九歲，又搵到錢又靚仔，要搵第二個女友真係易如反掌。
不過，艾琳娜經理人方面又出嚟澄清，話佢只係工作太忙，先唔得閒陪C朗出席金球獎頒獎禮，叫人唔好諗多咗喎，但係艾琳娜嘅instagram，上個禮拜先上載自己去咗馬爾代夫度假相，好心艾琳娜經理人搵藉口都搵個好啲先啦。
識睇，一定係睇足英台【英波Live】：
http://soccer.appledaily.com
http://bit.ly/engballlive