梁振英日前發表施政報告時，又再提一個「五歲小朋友」問佢，「我長大後住哪裏？香港還有沒有足夠土地？」不過由於梁振英呢個「五歲小朋友」畀網民話已出現過幾次，但係次次有小小唔同，所以唔只有市民質疑佢講大話，工業界議員林大輝前日喺答問大會，亦質疑「五歲小朋友」只係虛構。不過梁振英噚日接受英文電台訪問，就話五歲小朋友「is a real child（真有其人）」，係佢幾個月前，某個周日喺旺角花墟遇到，佢仲係訪問入面用「She（她）」去稱呼呢位小朋友，即係「五歲小朋友」係女仔，又讚佢「very smart（非常聰明）」，估計呢個小朋友平日有同家人有討論房屋問題，至問得出呢條問題喎。