梁振英將港大《學苑》擺上枱，等北京以為香港有人發動武裝港獨。做戲要做全套，近日政圈盛傳，CY近排召見港大「外國勢力」、校長馬斐森，以校監身份對佢「照肺」，長達個半鐘，除咗批港大有教授搞佔中，可能有提埋《學苑》單嘢。
港大同特首辦都冇證實雙方近期有見面，不過港大網頁顯示，CY上周六出席港大一個閉門捐款儀式，有圖有真相；同日下晝佢哋再喺沙田馬場碰面，即CY被掟雞蛋嗰日。其實狼英之前閉門見政協，已批評馬斐森做得唔好。
《學苑》風波相信無咁快平息，邊個咁醒向CY獻計？頭號嫌疑係「左王」、中央政策組首席顧問邵善波，但據聞佢冇將港大放在眼內；次號疑人係做過《學苑》總編嘅中央政策組全職顧問王卓祺，但好似話佢不屑針對學生。
傳馮煒光搞《學苑》
近日盛傳最有可能係「三個字」、新聞統籌專員馮煒光，皆因佢係港大同學聯老鬼，聽聞佢咁多年仲好關心同有細閱《學苑》，所以睇見後輩搞到《學苑》咁出位，即刻上報老細。仍有喺親政府報章以筆名撰文狙擊港大嘅佢，聽日會以前學聯成員身份出席《城市論壇》，講《學苑》事件，主持人謝志峰證實請咗佢做嘉賓，八方買咗花生，一於同大家一齊等睇好戲。