「高登男神」新民主黨同盟議員范國威，平日被傳媒攝入鏡好平常，但佢噚日突然變身攝記，攞住部相機不斷影接受緊訪問嘅白鴿黨議員黃碧雲背脊（圖），令唔少傳媒都笑咗出嚟，問佢究竟搞邊科？咖喱飯解釋，只係向助理示範，影相可以唔影前面，如果用現場嘅光，其實「影後」都可以好有戲劇感。
咪以為咖喱飯只識影相，開會時唔專心，原來佢連議員會上一字一句都聽得超仔細。噚日佢就批評新民黨田二少發言時自稱係樂隊Simon & Garfunkel粉絲，但引用《Sound of Silence》呢首名作嘅歌詞時竟然講錯咗，令人質疑佢究竟係咪真正fans。