英超球員已經同金球獎無緣好耐。近五屆金球獎三甲都係來自拜仁、皇馬同巴塞。反映出英超球隊近年喺歐洲嘅成績唔算太理想。近十年嚟嘅英格蘭足球先生，包括亨利、C朗、加里夫巴利、蘇亞雷斯等等，得獎後就去到西甲兩大豪門發展。拜仁、皇馬同巴塞可能係世界上最好嘅球隊，但英超仍然係最可觀嘅聯賽，球隊普遍水平較高，強強碰頭充滿火花，每間球會都有好多「死硬派」球迷，呢啲因素都提高咗英超嘅可觀性。
今年為港超聯推廣工作出一分力，雖然只係負責海報同網上宣傳品嘅設計，但我都好開心，因為可以幫到港足嘅話，都應該盡力幫。不過幫手之後，我先明白香港球圈嘅資源並唔足夠， 雖然一啲大會好似東方、太陽飛馬咁，都有一定資金去做宣傳推廣，但係有更多球會，無預算留畀推廣工作。呢一刻，我深深感受到咩叫做「巧婦難為無米之炊」！要有一個可觀嘅聯賽，未必要有最好嘅球員。但一定要有球迷支持，球隊之間嘅差距唔可以太大。可惜港超聯暫時喺呢兩點上，可做嘅事都唔多。正如前輩李德能先生都話：「要做得好，唔單止係足總，更要整個球圈、甚至香港人團結先可以成事。」
阿仙奴夠sharp作客照撐
下周日曼城（圖）對阿仙奴，兩隊嘅球迷都唔想輸畀對方，特別係阿仙奴，話晒曼城有唔少球員都係喺阿仙奴度撬過去，為爭啖氣都唔想輸啦！阿仙奴近期比曼城sharp，有力作客贏波，不過曼城始終唔係「省油的燈」，阿仙奴亦未必贏得輕鬆，單W同埋3:2波膽係唔錯嘅選擇！
LULU
不懂踼波愛睇波