本周三特首梁振英喺立法會宣讀施政報告，唔少官員同議員難抵催眠咒，八方仲見到勞工及福利局局長張建宗一度除低眼鏡捽眼，似乎係抖擻精神，以免瞓着咁款。有政府中人噚日笑笑口同八方講，其實張建宗唔係眼瞓、而係眼部敏感啫，大爆肥仔張喺太光同太乾嘅環境，對眼都會痕癢唔舒服，忍唔住就會用手捽眼。八方好奇問肥仔張咁慘，平日使唔使食藥？政府中人就話唔使。而同樣俾八方同事影到當日開會時面露疲態嘅建制派議員林健鋒、葉國謙、黃定光同Tree根，噚日圍埋開心重溫靚相，其間有講有笑。林健鋒同八方講，佢為咗幅靚相，專登叫助理買咗幾份《蘋果日報》剪存留念。